Thread: Aaye Kuchh Abr Kuch Sharaab Aaye

aaye kuchh abr kuch sharaab aaye
us ke baad aaye jo azaab aaye


baam-e-miinaa se maahtaab utre
dast-e-saaqii meN aaftaab aaye


har rag-e-KhuuN meN phir charaaGhaaN ho
saamne phir wo be-naqaab aaye


kar rahaa thaa Gham-e-jahaaN kaa hisaab
aaj tum yaad be-hisaab aaye


na ga’ii tere Gham kii sardaarii
dil meN yuuN roz inqilaab aaye


is tarah apnii Khamoshii guuNjii
goyaa har simt se javaab aaye


“Faiz” thii raah sar-ba-sar manzil
ham jahaaN pahuNche kaamyaab aaye

nice one.....!!!